Kórdrengir í essinu sínu í Mirage

Eftir tap Fylkis fyrr um kvöldið áttu Kórdrengir möguleika á að koma sér úr botnsætinu, en með sigri gat Ármann tryggt sér fjórða sætið í deildinni og þátttökurétt á Stórmeistaramótinu sem fram fer í lok apríl.

Ármann hafði pakkað Kórdrengjum saman í Overpass, 16–3 fyrr á tímabilinu en Kórdrengir unnu Ármann svo í Nuke 16–10. Í þetta skiptið lá leiðin í Mirage, kort sem Kórdrengir kunna vel við og unnu þeir hnífalotuna. Kórdrengir kusu að byrja í vörn (Counter-Terrorists) og Ármann sótti.

Snky hóf leikinn með stæl og fjórfaldri fellu til að krækja í skammbyssulotuna fyrir Kórdrengi. Hann fylgdi því eftir með þrefaldri fellu í þeirri næstu sem einnig féll Kórdrengjum í vil. Þá gaf Ármann í, minnkaði muninn og jafnaði 2–2. Kórdrengir voru strax orðnir blankir en tókst engu að síður að umkringja sprengjuna og láta tímann renna út til að koma sér aftur yfir.

Ármann leitaðist mikið við að ná miðjunni en ákvarðanaleysi gerði það að verkum að þeim tókst ekki að skapa sér nein tækifæri úr því. Í stöðunni 5–3 fyrir Kórdrengjum tók Ármann leikhlé til að ráða ráðum sínum en allt kom fyrir ekki og Kórdrengir unnu næstu fjórarlotur . Voru þeir vel staðsettir á kortinu og gátu brugðist snöggt við tilraunum Ármanns. Snky var enn atkvæðamikill en annars skiptu leikmenn beggja liða fellunum bróðurlega á milli sín.

Ármann tók þó annað leikhlé til að leita lausna en aftur bar það lítinn árangur. Kórdrengir bættu næstu þremur lotum við, unnu samtals átta í röð og staðan góð þegar síðari hálfleikur gekk í garð.

Staða í hálfleik: Kórdrengir 12 – 3 Ármann

Í síðari hálfleik skiptu liðin um hlutverk að vanda og varnarhlutverkið hentaði Ármanni greinilega betur í upphafi. Ármann vann fyrstu tvær loturnar hratt og örugglega. Enn var langt í land og Kórdrengir komust í 13–5 áður en Ármann komst á almennilegt ról og bætti þremur lotum við.

Kórdrengir voru þó hvergi nærri búnir að gefast upp og í sparlotu komu þeir sér í fjórtán stig með því að sækja sér upplýsingar vel, eins og í fyrri hálfleik, og bregðast vel við hreyfingum Ármanns. Ármann lék þá sama leik og Kórdrengir tóku leikhlé. Ólíkt því sem gerðist hjá Ármanni bar leikhléið árangur og fóru Kórdrengir fullvopnaðir inn í 25. lotu með 15 stig gegn skammbyssuhlöðnu liði Ármanns. Ármanni tókst með ótrúlegum hætti að missa ekki mann og enn var líf í leiknum.

Þá voru Kórdrengir orðnir blankir og fjórföld fella frá Ofvirkum og falleg flétta með flössum minnkaði muninn í 15–12. Sigurinn kom loks í 28. lotu og Kórdrengir lyftu sér upp úr botnsæti deildarinnar í fyrsta sinn á tímabilinu. Snky var stigahæstur með 29 fellur og tveir góðir sigrar í röð hjá Kórdrengjum boða gott fyrir það litla sem eftir er af tímabilinu.

Lokastaða: Kórdrengir 16 – 12 Ármann

Í næstu viku mætir Ármann Fylki þriðjudaginn 22. mars en föstudaginn 25. mars taka Kórdrengir á móti Sögu. Sýnt verður frá leikjunum á Stöð 2 Esport og á Twitch síðu Rafíþróttasamtaka Íslands.