Age of Empires 4: Ef það er ekki bilað, ekki breyta því

Við tölum ekki um þriðja leikinn.

AoE4 er framleiddur af Relic Entertainment og Worlds Edge og er gefinn út af Xbox Game Studios. Starfsmönnum þessara fyrirtækja tekst vel að fanga anda gömlu leikjanna og í senn færa leikinn inn í nútímann.

Leikirnir eru mjög líkir en sá nýrri byggir á nýrri tækni og aukinni getu tölva. Það auk þó nokkurra vel heppnaðra viðbóta gerir hann í raun betri. Það er þó hægt að líta á skort á framsækni sem galla en ég er ekki viss um að ég geri það.

Ég hef í stuttu máli sagt skemmt mér konunglega yfir AoE4 og til marks um það hefur hann komið töluvert niður á svefni mínum.

Það er ekki oft sem maður kemst í að spila leiki eins og AoE4 á þessum nýjustu og verstu tímum. Maður byrjar með nokkra vinnumenn og þarf að byggja upp byggð, varnir og heilu herina.

Mat fær maður með því að týna ber, veiða og rækta. Gull fær maður með námugreftri og viðskiptum. Timbur fær maður svo með því að, viti menn, höggva niður tré. Þessar auðlindir notar maður til að byggja hús og heri auki þess sem maður þarf að þróa nýja og betri tækni til að fá forskot á óvini sína.

Ég hef aldrei haft mikinn áhuga á að spila RTS-leiki á netinu. Það má að miklu leyti rekja til þess að ég vil hafa gaman en ekki fá sinaskeiðabólgu við að keppast við að fylgja einhverri formúlu um það hvernig best sé að sigra þessa leiki eins hratt og ég mögulega get.

Ef ég þarf að mæla skipanir sem ég get gefið á mínútu er ég ekki að skemmta mér vel.

Einspilun AoE4 er frábær. Maður byrjar á því að leika frægar orrustur úr sögunni og í gegnum þau borð kennir AoE4 manni það sem maður þarf að kunna til að sigra erfiðari borð leiksins og tölvuna í opnum leikjum.

Í gegnum einspilunina spilar maður sem helstu fylkingar AoE4 eins og Bretar, Frakkar, Mongólar, Kínverjar, Rús, Heilaga rómverska keisaraveldið, Indverjar og Abbasid-veldið. Spilarar leika raunverulegar orrustur eftir og fræðast um þær og menningarheimana sem um ræðir.

Hver fylking er með eigin hæfileika, kosti og galla. Munurinn á milli þeirra er töluvert meiri en hann hefur verið í eldri leikjum seríunnar.

Mér finnst jafnvægi leiksins frekar gott. Við flestar kringumstæður er erfitt að bera sigur úr býtum án þess að vera með fjölbreytta heri.

Bogakarlar eru góðir gegn spjótamönnum, spjótamenn eru góðir gegn hestamönnum, hestamenn eru góðir gegn bogakörlum og svo koll af kolli. Til að komast í gegnum varnir þarf svo að byggja valslöngvur, turna til að komast upp á veggi og margt fleira.

Þetta jafnvægi leiðir til þess að bardagar eru merkilega skemmtilegir og geta verið krefjandi. Þá sérstaklega þegar maður þarf að ráðast á virki andstæðinga sinna.

Það er líka eins gott að það sé skemmtilegt, því það er bókstaflega það sem þessi leikur gengur út á. 

Samantekt-ish

Það er smá hluti af mér sem veltir vöngum yfir því hvort ekki hafi tapast einhverskonar tækifæri með því að breyta meira til. Svo hugsa ég um þriðja leikinn, sem við nefnum ekki á nafn, og þær vangaveltur hverfa eins og vampírur í sólskini.

Það mun enginn sem hafði gaman af AoE2 þykja þessi nýi leikur leiðinlegur. Ekki nokkur maður, segi ég og skrifa. Aðrir og líklegast yngri leikjaspilarar sem hafa gaman af RTS-leikjum ættu sömuleiðis að skemmta sér yfir Age of Empires IV.