Jólalag dagsins: Vandræði að vera vegan í jólaboði

Tuttugasti desember er runninn upp og því fjórir dagar til jóla. Á sjónvarps- og útvarpsvef Vísis má finna fjölmörg hugljúf jólalög sem margir af okkar fremstu listamönnum hafa tekið í gegnum tíðina.

Vísir telur niður til jóla með fallegu jólalagi úr safni sínu á hverjum degi.

Að þessu sinni eru það Salóme R. Gunnarsdóttir og Pálmi Freyr Hauksson úr leikhópnum Improv Ísland sem flytja jólalagið. Það er í óhefðbundnari kantinum þar sem lagið fæddist í söngspuna í þættinum Jólaboð Jóa árið 2017 á Stöð 2.

Það tíðkast í spunaleikhúsi að fá tillögur úr sal og vinna síðan með þær hugmyndir. Salóme og Pálmi fengu orðið Snickers frá borðinu í jólaboðinu og nánast engan tíma til umhugsunar áður en Karl Olgeirsson hóf undirspil.

Úr varð stórskemmtilegt jólalag um þau vandræði sem geta fylgt því að vera vegan í jólaboði.