Rauði herinn skrefi nær undanúrslitunum

Liverpool er í góðri stöðu eftir fyrri leikinn gegn Porto í átta liða úrslitum Meistaradeildarinnar en Liverpool vann 2-0 sigur á Anfield í kvöld.

Það var ljóst að það væri erfitt verkefni sem biði Porto í kvöld en þeir rauðklæddu út Bítlaborginni hafa verið sjóðandi heitir undanfarnar vikur og mánuði.

Eftir einungis fimm mínútur voru heimamenn komnir í forystu. Firmino fékk boltann inn á teignum, lagði hann til Naby Keita sem þrumaði boltanum í netið. Boltinn hafði viðkomu í varnarmanni sem truflaði Iker Casillas í markinu.

Keita hafði ekki skorað í búningi Liverpool fyrr en á föstudaginn er hann skoraði í sigri á Southampton. Hann hélt því uppteknum hætti í kvöld og kom Liverpool á bragðið.

Naby Keita has now scored two goals in his last two appearances for Liverpool across all competitions, having failed to score in his first 27 appearances for the club.

Continuing where he left off on Friday evening. pic.twitter.com/saHYkinIh7

— Squawka Football (@Squawka) April 9, 2019

Á 26. mínútu varð staðan 2-0. Roberto Firmino þurfti þá bara að ýta boltanum yfir línuna eftir frábært samspil Jordan Henderson og Trent Alexander-Arnold. Góð staða Liverpool í hálfleik.

Liverpool hafði mikið boltann í síðari hálfleik en ekkert mark var skorað í síðari hálfleiknum og Púlarar því í góðri stöðu fyrir síðari leikinn. Hann fer fram næsta miðvikudag.