Yfir 100 ung­menni í al­þjóð­legum rokk­búðum í Land­búnaðar­há­skóla Íslands

Yfir 100 ungmenni, flest á aldrinum 18 til 22 ára, munu í sumar taka þátt í alþjóðlegum rokkbúðum sem fram fara í Landbúnaðarháskóla Íslands á Hvanneyri.

Íslensku sjálfboðaliðasamtökin Stelpur rokka! standa að búðunum ásamt ellefu öðrum rokkbúðasamtökum sem starfa víðs vegar í Evrópu en markmið búðanna er að efla evrópskt samstarf rokkbúða.

„Við fundum hvert annað í gegnum alþjóðasamtök rokkbúða sem heita Girls Rock Camp Alliance sem flest þessi samtök eru hluti af. Okkur langaði að efla evrópska samstarfið, meðal annars vegna þess að það er erfitt fyrir margar búðir í Evrópu að ferðast til Bandaríkjanna þar sem er rokkbúðaráðstefna á hverju ári. Þannig að okkur langaði að byggja upp evrópskt samstarf sem hefur reyndar verið í uppbyggingu síðan 2012, 13,“ segir Auður Viðarsdóttir, verkefnastýra alþjóðlegu rokkbúðanna hjá Stelpur rokka!

Vikulangar búðir sem fara fram í ágúst

Fyrstu alþjóðlegu rokkbúðirnar voru haldnar í Berlín síðasta sumar og kom Auður einnig að skipulagningu þeirra. Hún ásamt samstarfskonu sinni sem starfar rokkbúðasamtök í Berlín sóttu um styrk í gegnum Erasmus-ungmennaskiptaverkefni og fengu.

Þannig var hægt að halda rokkbúðirnar í Berlín og gekk það svo vel að ákveðið var að sækja aftur um styrk og þá fyrir rokkbúðum hér á landi. Styrkurinn fékkst aftur og er undirbúningur búðanna á Hvanneyri nú í fullum gangi.

Tilgangurinn er að byggja upp evrópska samstarfsnetið og markmiðið er að ungmennin sem taki þátt í búðunum leiði starfið.

Búðirnar fara fram þann 5.-12. ágúst. Um klassískar vikulangar rokkbúðir er að ræða eins og Stelpur rokka! hafa haldið hér á landi undanfarin sjö ár sem enda á lokatónleikum þátttakenda. Helsti munurinn er sá að þátttakendur gista á staðnum þar sem búðirnar fara fram.

Fyrir ungmenni sem hafa færri tækifæri

Hver samtök senda fjóra til sjö þátttakendur í búðirnar og tvo til fjóra leiðbeinendur. Búðirnar eru fyrir stelpur, transungmenni, kynsegin ungmenni og intersex ungmenni að sögn Auðar og er aldursglugginn 16 til 30 ára. Flestir þátttakendur verða þó að öllum líkindum á aldrinum 18 til 22 ára.

„Þessar búðir eru hannaðar fyrir ungmenni sem hafa færri tækifæri eins og Erasmus-prógrammið orðar það. Þannig að fólk sem myndi að öðrum kosti ekki hafa tækifæri á að taka þátt í svona alþjóðlegum verkefnum vegna fjárhagsaðstæðna, fötlunar eða annars. Langflest samtökin sem taka þátt eru eins og Stelpur rokka!, það er leggja mikið upp úr því að ná til krakka sem þurfa á svona að halda og þau sjá þá um að ná til ungmenna í sínu samfélagi sem passa inn í þetta markmið,“ segir Auður.

Landbúnaðarháskólinn nánast fullkominn staður fyrir búðirnar

Þátttakendur í búðunum á Hvanneyri í sumar munu geta valið um þrjár línur, eins og Auður orðar það. Ein línan snýr að tónlistinni sjálfri þar sem þátttakendur mynda hljómsveitir, læra á hljóðfæri, semja lög og koma fram á lokatónleikum.

Önnur línan snýst um miðlun þar sem þátttakendur búa til efni til að miðla því sem fer fram í búðunum, taka til dæmis myndir, viðtöl, myndbönd, gera hlaðvörp og jafnvel stuttmyndir.

Þriðja línan er svo nokkurs konar verkefnastjórnun. Auður segir þá línu fyrir ungt fólk sem hafi áhuga á að læra meira hvernig hægt er að stofna alþjóðlega hreyfingu, framkvæma hugmyndir að verkefnum í heimalandinu og skapa lýðræðislegar hreyfingar. Þá sjái sá hópur einnig um að skipuleggja lokatónleikanna.

Auður segir að það hafi verið smá flókið að finna rétta staðinn fyrir búðirnar hér á landi þar sem aðgengi fyrir fatlaða þurfi að vera til staðar. Þá mátti staðurinn ekki vera of langt frá Reykjavík. Landbúnaðarháskólinn á Hvanneyri hafi svo reynst nánast fullkominn kostur.

„Við erum einmitt að klára samningagerði við Landbúnaðarháskólann. Það er mjög skemmtilegt og við erum mjög ánægðar með það. […] Þau eru með alls konar gistirými og allt á sama svæðinu og svo þetta stóra hús sem er með alveg nógu mörgum rýmum. Svo mætum við með allar græjur auðvitað, við erum vanar því. Tónleikarnir verða svo í gamalli hlöðu sem verður breytt í tónleikastað í samráði við staðarhaldara,“ segir Auður.

Langar að virkja nærsamfélagið í Borgarbyggð

Aðspurð um hvernig búðirnar séu fjármagnaðar segir hún að Erasmus-styrkurinn nái að dekka lágmarkskostnað, það er flug, mat og gistingu og eitthvað örlítið meira. Ísland sé hins mjög dýrt miðað við Berlín og því þurfi að fylla upp í nokkur göt.

„Þannig að við erum bara mjög opin fyrir samstarfi við fyrirtæki ef þau vilja styrkja okkur á einhvern hátt, með mat, bílaleigubílum, hljóðfærum eða bara hverju sem er. Við erum líka að sækja um fleiri styrki,“ segir Auður.

Þá langi skipuleggjendur rokkbúðanna einnig að virkja nærsamfélagið í Borgarbyggð þar sem búðirnar gætu verið gott tækifæri fyrir það samfélag að vekja athygli á sér.

„Okkur langar líka að bjóða upp á skoðunarferðir þannig að við munum líka vera í sambandi við aðila í kring ef þeir hafa áhuga á samstarfi,“ segir Auður.