Vörur fyrir vandamálin sem enginn talar um

Íslenska lyfjafyrirtækið Florealis hefur sett á markað línu af viðurkenndum jurtalyfjum og lækningavörum sem styðja við heilbrigði kvenna. Markmiðið er að hvetja  konur til að láta ekki væg vandamál stöðva sig. Fyrirtækið vill opna umræðu um heilsu kvenna og stuðla að aukinni fræðslu.

„Við ákváðum að fara af stað með vörulínu sem styður heilbrigði kvenna vegna þess að okkur fannst vanta áreiðanlegar og viðurkenndar lækningavörur til að meðhöndla algeng einkenni sem konur upplifa,” segir Sandra Mjöll Jónsdóttir, vörustjóri hjá Florealis.

„Það er svo margt sem tengist okkur konum sem enginn þorir að tala um. Við viljum opna betur umræðuna um heilbrigði kvenna og auka fræðslu. Líkaminn okkar breytist mjög mikið yfir ævina og stundum áttum við okkur ekki á því hvað er að gerast. Það eru tímabil á ævi hverrar konu þar sem að hún upplifir einkenni sem tengjast breytingum, hvort sem það er vegna meðgöngu eða tíðahvarfa. Mörg þessara einkenna eru óþægileg og hafa áhrif í líf okkar og líðan. Þetta á til dæmis við um þurrk í leggöngum og hitakóf sem margar konur upplifa í tengslum við tíðahvörf. Þetta er óþægilegt og maður hefur ekki stjórn. Svona einkenni geta haft veruleg áhrif á daglegt líf en eru því miður lítið rædd,” segir Sandra Mjöll.

Vilja lifa virku og heilbrigðu lífi

Nútímakonur gera kröfur um að geta lifað virku og heilbrigðu lífi og sætta sig ekki við að geta ekki stundað líkamsrækt, ferðast eða notið lífsins til fulls vegna vandamála sem tengjast tíðahvörfum eða öðru. Sandra Mjöll segir þó enn of fáar leiðir til að meðhöndla þessi vandamál á einfaldan hátt.

„Við hjá Florealis sáum þetta sem tækifæri til að koma til móts við konur og setja vörulínu á markað sem tæki mið af þörfum kvenna á öllum aldri. Það hefur farið mikil vinna í að greina þessa hluti og við áttuðum okkur á því að þetta yrðu að vera vörur sem væru þróaðar af konum fyrir konur. Þetta eru allt viðurkenndar lækningavörur sem samþykktar eru af lyfjayfirvöldum og notkun þeirra er einföld. Við vitum að það skiptir miklu máli."

Góð reynsla komin á fyrstu vörurnar

Fjórar vörur sem styðja við heilbrigði kvenna eru þegar komnar á markað frá Florealis, þrjár lækningavörur og eitt lyf. Lækningavörurnar eru gel gegn leggangaþurrki, leggangastílar gegn sýkingum og froða sem dregur úr kláða og ertingu á kynfærasvæði. Lyfið heitir Lyngonia og er meðferð við endurteknum þvagfærasýkingum. Vörurnar hafa verið fáanlegar í ár og reynst mörgum konum mjög vel.

„Gelið gegn leggangaþurrki heitir Smaronia og er sérstaklega vinsælt hjá konum sem upplifa þurrk í leggöngum í tengslum við tíðahvörf,” útskýrir Sandra Mjöll. „Ólíkt öðrum gelum þá er það ekki einungis mjög rakagefandi heldur styður einnig uppbyggingu heilbrigðrar slímhúðar í leggöngunum og dregur úr eymslum. Gelið hjálpar einnig til við að draga úr óþægindum við samfarir, en þurrkur og eymsli í leggöngum geta haft mjög neikvæð áhrif á kynlífsupplifun kvenna. Hver skammtur kemur í lítilli túbu með túbusprota svo að notkun er mjög auðveld.”

Ójafnvægi í bakteríuflóru

,,Liljonia eru litlir stílar til að setja í leggöng þegar grunur er um sýkingu. Margar konur þekkja mjög vel að fá sveppasýkingu í leggöng með tilheyrandi sviða og óþægindum. Sumar fá slíkar sýkingar ítrekað. Þessar sýkingar eru oftast meðhöndlaðar með kremum og stílum. Það sem gleymist hinsvegar oft að ræða er að margar sýkingar í leggöngum hafa ekkert með sveppi að gera,” segir Sandra Mjöll. Samskonar sviði og óþægindi komi einnig fram þegar bakteríuflóra legganganna er í ójafnvægi.

„Slíkt ójafnvægi getur til dæmis skapast þegar farið er á sýklalyf eða þegar sýrustig legganganna breytist til dæmis vegna sæðisvökva í leggöngum eða blæðingum. Liljonia stílarnir draga úr sviða og ertingu í leggöngunum og koma aftur á jafnvægi í sýrustigi og bakteríuflóru. Þar að auki eru stílarnir í þægilegri stærð og auðvelt að koma þeim fyrir.

Algeng óþægindi sem enginn talar um

,,Varan sem hefur kannski komið mest á óvart eru mjúka froðan okkar sem heitir Rosonia. Froðan er til að bera á svæðið fyrir utan leggöngin, spöngina og skapabarma. Hún kælir og dregur hratt úr kláða, sviða og ertingu á þessu svæði. Upprunalega gerðum við ráð fyrir að hún yrði vinsælust á meðal þeirra sem að eru með sýkingu eða bólgu á þessu svæði en svo hefur komið í ljós að óþægindi á þessu svæði eru mun algengari en við héldum. Það bara talar aldrei neinn um það,”  segir Sandra Mjöll. Konur á öllum aldri noti Rosonia og af ólíkum ástæðum.

„Konur sem að stunda hjólreiðar upplifa til dæmis oft eymsli á þessu svæði vegna núnings og ertingu frá svita. Sumar konur verða aumar í kringum blæðingar vegna ertingar frá tíðablóði og vökva sem liggur við húðina. Aðrar konur eru að fást við óþægindi og sprungur á spangarsvæði eftir að hafa átt börn. Ástæðurnar geta verið mjög mismunandi en Rosonia virðist gagnast mjög vel í öllum tilvikum. Við höfum meira að segja lent í því að konur frá öðrum löndum eru að hafa samband við okkur til að kaupa Rosonia vegna þess að þær vantar viðurkennda meðferð við sínum vandamálum. Það sem að heillar líka margar er að froðan er í nettum umbúðum sem er auðvelt að hafa með sér og það er mjög auðvelt að bera froðuna á svæðið því að hún klístrast ekkert.”

Fræðsluefni í samstarfi við sérfræðilækna

,,Við erum mjög stolt af vörunum okkar og þakklát fyrir viðtökurnar sem þær hafa fengið. Það er klárt mál að það er þörf fyrir þessar vörur. Við leggjum líka upp úr því að hafa vörurnar aðgengilegar og erum því til staðar í öllum apótekum landsins þar sem hægt er að fá vörurnar okkar án lyfseðils. Við höldum úti fræðslubloggi á heimasíðunni okkar, florealis.is, þar sem að við setjum inn fræðandi pistla sem við vinnum í samstarfi við sérfræðilækna og heilbrigðisstarfsfólk. Við leggjum mikinn metnað í vörurnar okkar, þær eru allar skráðar sem lækningavörur og uppfylla kröfur evrópskra lyfjayfirvalda um rétta verkun og gæði. Við vitum hvaða kröfur konur gera í dag og hvað þarf til að koma til móts við þær.”

Sjá nánar áwww.florealis.is



Þessi kynning er unnin í samstarfi við Florealis