Iago Aspas maður leiksins í jafntefli gegn Barcelona

Spænski boltinn hélt áfram að rúlla um helgina og fyrsti leikur dagsins var viðureign Barcelona og Celta Vigo.

Fyrir leikinn voru Barcelona í 1.sæti deildarinnar með 35 stig á meðan Celta Vigo voru í 10. sæti með 17 stig.

Það voru gestirnir frá Celta Vigo sem byrjuðu leikinn óvænt betur og var það Iago Aspas, fyrrum leikmaður Liverpool, sem kom þeim yfir á 20. mínútu.

Það tók hinsvegar Barcelona ekki langan tíma að jafna metin en það gerði Lionel Messi aðeins tveimur mínútum seinna og var staðan 1-1 í hálfleik.

Heimaliðið byrjaði seinni hálfleikinn betur og sóttu stíft og það skilaði sér á 62.mínútu þegar Luis Suarez skoraði og kom sínum mönnum yfir í fyrsta sinn í leiknum.

Celta Vigo voru hinsvegar ekki á þeim buxunum að gefast upp jöfnuðu þeir metin á 70. mínútu og var þar á ferðinni Maxi Gomez eftir frábæran undirbúning Iago Aspas.

Þetta voru lokatölur og eftir leikinn er Barcelona komið með 36 stig á meðan Celta Vigo eru með 18.