Mörk mennskunnar

Það er vísindalega sannað að allir eru eins. Sami grauturinn. Litningar í spíral. 57% vatn. Síka-veirunni er alveg sama hvort þú ert bókasafnsfræðingur eða fitness-drottning. Þú getur lítið annað gert en að sýna hræðslu. Það er mannlegt. Kannski er lausnin við hinu mannlega ástandi að borða chia-graut. Fara út að hlaupa. Ekki of langt samt því það skemmir hnén. Ekki of stutt heldur. Hjartað þarf að slá 135 sinnum á mínútu fyrir góða brennslu. Þessi vöðvabolti í kjarna hverrar manneskju sem eitt sinn var miðstöð tilfinninga. Það er vísindalega sannað að honum má skipta út fyrir hjarta úr svíni. Bíddu bara. Svínið er á leiðinni inn í þig, svínið þitt.

Glæpum fer fækkandi. Það er vísindalega sannað. En barnaperrar eru perralegri en nokkru sinni fyrr. Gleraugu þeirra eru kámugri, bland í poka pokarnir úttroðnari, aftursætin á bifreiðum þeirra grárri og hrjúfari. Það náðist mynd af einum og hann var ekki maður heldur svín. Bleikur og þrútinn með pínulítil augu og hrjúfa ljósa hárbrodda á höfðinu. Það er vísindalega sannað að mennskan var horfin. Hann var svín og hann ætlar að breyta börnunum þínum í svín. Það eyðileggur þig að verða fyrir glæp, skemmir þig og skilgreinir þig. Það er sálfræðilega og efnafræðilega og réttarmeinafræðilega sannað. Þú ert það sem aðrir gera þér. Þú ert ekki það sem aðrir gera þér. Það er vísindalega sannað. Þú ert bara þú. Ekkert annað. 57% vatn. Ekkert annað. Bara þú og 57% vatn.

Þú ert múslimi. Þú ert þjáning fólks í Mið-Austurlöndum. Þú ert flóttamaður. Þú ert ekki flóttamaður. Þú getur ekki sett þig í spor annarra, svínið þitt. Hvað heldur þú að þú sért? Þú ert endurskoðandi, grautur af hugmyndum sem borðar chia-graut. Þú ert góður við börnin þín. Börnin þín eru flóttamenn. Það eru börnin þín sem er að skola upp á strendur Miðjarðarhafs. Gættu barnanna þinna, svínið þitt. Þetta eru ekki börnin þín, sjálfumglaða svín. Taktu Fisher Price leikföngin þín og settu þau í blenderinn og helltu þeim út í grautinn sem þú ert. Maðurinn étur allt. Hann hafnar aldrei neinu. Vertu velkomið inn í hjarta mitt, svín. Vertu hjarta mitt.

Þú ert með sterka réttlætiskennd. Þú mátt ekkert aumt sjá. Þú ert aumingi. Það er hrokafullt að vera ekki aumingi. Þú ert minni máttar. Þú ert áfall. Þú átt auðvelt með að setja þig í spor annarra nema spor þeirra sem eru með kámug gleraugu. Þú ríst upp á afturlappirnar þegar aðrir þjást. Afturlappirnar, svínið þitt? Ertu ekki eitthvað að ruglast og halda að þú sért maður? Ertu að reykja hass? Áfengi er hættulegra en hass. Hass er hættulegra en áfengi. Pillur eru lausnin. Ekki gagnrýna þá sem taka pillur. Það er ekki tabú. Pillur eru hræðilegar. Gagnrýndu þá sem taka pillur. Ekki gagnrýna þá sem taka pillur. Allt þetta er vísindalega sannað.

Er heimurinn ruglandi? Veistu ekki hver þú ert? Taktu mynd af þér og póstaðu henni. Fáðu álit hinna. Og ef öllum er sama gerðu þá eitthvað róttækt. Öskraðu. Skjóttu úr byssu. Farðu úr skónum og leggstu á teppi. Nei. Litaðu hárið á þér blátt. Nei hvítt. Nei hafðu það rautt. Fokkit, hafðu það í öllum frönsku fánalitunum því #ÞúErtCharlie nema þegar þú ert eitthvað annað. Ekki skilja útundan. Styddu alla, alltaf. Vertu regnbogi. Vertu BDSM. Ekki vera BDSM. Lastaðu ei laxinn, svínið þitt. Þú átt heima í drullu. Þú ert grautur. Nei þú ert 57% vatn. Þú ert tær þó hjarta þitt sé úr svíni. Svín gráta. Svín svitna. Svín fróa sér. Það er hollt að fróa sér. Það er ógeðslegt að fróa sér. Svín gera það. Stattu með sjálfum þér.

Þú ert maður. Þú ert kona. Konur eru ekki menn. Í mönnum er kvenlitningur. Menn vilja kúra. Menn eru með geirvörtur en þær mjólka ekki. Jú, þær mjólka. Það er vísindalega sannað þó það gerist sjaldan. Konur eru menn. Geirvörtur eru ekki kynfæri. Það er vísindalega sannað. Ef þú færð standpínu við að sjá geirvörtu ertu perri. Það er rangt að kalla fólk perra. Það er vísindalega sannað og lífefnafræðilega réttmætt að móðgast yfir því. Ef þú ert í vafa kallaðu fólk svín. Bentu á stóra feita svínið í ræðustólnum með sínar ógeðslegu svínaskoðanir. Bentu á svínið og segðu svo að við séum öll eins. Settu þig í spor svínsins. Kjóstu svínið. Ekki fróa þér yfir klámi því það styður mansal. Fróaðu þér yfir svínum. Svín eru með fjórtán geirvörtur. Það er vísindalega sannað að 60% þeirra eru kynfæri. Ekki fróa þér yfir svínum. Fróaðu þér yfir svínum. Ekki fróa þér yfir svínum nema þú sért sjálfur svín. Ekki fróa þér yfir sjálfum þér. Fróaðu þér yfir sjálfum þér. Þú ert ekki tabú. Ekki fróa þér yfir sjálfum þér.

Það eru ekki til rök lengur. Það eru ekki til staðreyndir. Það eru ekki til vísindi. Siðferði er 60% óljósara en það var árið 2002. Það er vísindalega sannað. Þú ert svín. Þú ert chia-grautur. 57% vatn. Þú ert perri. Þú ert svín. Þú veist 20% meira en í fyrra. Þú veist ekkert. Ef þú ert ekki svín þá er þessi pistill ekki ætlaður þér, svínið þitt. Móðgastu samt. Það skilgreinir þig. Nei, þú þarft ekki skilgreiningu. Þú ert 57% vatn og restin einstök litningasósa í blender sem þú póstaðir á Instagram. Það er vísindalega sannað að það er ómannlegt að vera mennskur. Tattúeraðu það á hjarta þitt, það er það eina sem þú getur ekki svitnað út. Tattúeraðu það á 135 slaga á mínútu tifandi hjarta þitt, vísindalega sannaða yndislega ljósbleika sjálfsfróandi efnafræðilega siðferðislega þenkjandi svínsfleskið sem þú kallar hjarta þitt.

Pistillinn birtist fyrst í Fréttablaðinu