Fann 18 ára gamlan bíómiða við gerð línunnar

„Ég var að taka gamla leðurkápu í stundur í gær og fann þar gamlan bíó miða frá 98 á einhverja Nicolas skelfilega Cage mynd. Eða kannski er hún góð, ég hef ekki séð hana, það er mjög ólíkegt samt,“ segir Bergur Guðnason, einn þeirra sem sýnir á tískusýningu annars árs nema í fatahönnun við Listaháskóla Íslands sem fer fram í Hörpu í kvöld.

Undirbúningur hefur staðið yfir síðustu 7-8 vikurnar og verður afraksturinn sýndur í kvöld. Alls eru tíu nemendur sem sýna.

„Stemninginn er góð, það eru flestir komnir langleiðina með að klára, annars held ég að það sé alltaf eitthvað stress sem fylgir þessu. Ég á til dæmis eftir að gera nokkra hluti og klára eitthvað og það eru 3 tímar í mætingu niður í Hörpu,“ segir Bergur. 

Að þessu sinni er sýningin er unnin í samstarfi við Rauða Kross Íslands og vinna nemendur úr gömlum notuðum flíkum þaðan. En hvernig kom það til?

„Katrín Káradóttir kennarinn okkar kom með þemað og bar það undir okkur. Allur bekkurinn tók mjög vel í þetta strax. Þetta er búið að vera mjög áhugavert að vinna með gamlar flíkur. Guðbjörg hjá Rauða Krossinum er búin að vera æðisleg. Ég veit ekki hversu oft maður hefur hringt í hana til þess að athuga með eitt og annað.“

Sýningin, sem hefur yfirskriftina Misbrigði, hefst kl 20 í salnum Flóa í Hörpu og eru allir velkomnir.