Komdu með og gerðu góðverk í leiðinni

Núna er hárrétti tíminn til þess að byrja undirbúning fyrir þátttöku í hinu árlega Reykjavíkurmaraþoni. Þarna mæta allir sem vettlingi geta valdið og safna eins miklum áheitum og þeir mögulega geta fyrir þann málstað sem viðkomandi hefur trú á og vill hlaupa fyrir.

Það skiptir minna máli hversu langt er hlaupið, þátttakan og stuðningurinn er það sem skiptir mestu.

Reykjavíkurmaraþonið er tilvalinn vettvangur til þess að setja sér áskorun sem þarf að hafa fyrir. Undirrituð ætlar til að mynda að hlaupa hálft maraþon eða tuttugu og einn kílómetra þrátt fyrir að hafa aldrei hlaupið metra lengra en tíu kílómetra. Nú veit ég fyrir víst að það eru fleiri í sömu stöðu og jafnvel þó nokkrir sem aldrei hafa hlaupið nokkurn skapaðan hlut en ætla að leggja á sig erfiði fyrir góðan málstað.

Fyrir þá sem eru algjörir byrjendur þá eru nokkur atriði sem gera ferðina örlítið skemmtilegri og ekki síður þægilegri.

Hlaupaskór

Góðir skór eru algjör nauðsyn, þarna úti er hafsjór af fallegum íþróttaskóm og erfitt getur verið að velja á milli. Mestu máli skiptir að þeir séu þægilegir, styðji vel við fótinn og komi þér á leiðarenda án leiðinda. Þeir sem vilja fara alla leið ættu að fara í göngugreiningu og velja síðan skó sem henta þeim fullkomlega.

Fötin skapa hlauparann

Réttur fatnaður skiptir höfuðmáli, hann þarf að anda vel, þ.e.a.s hleypa svita út og fersku lofti inn. Ekki taka Rocky Balboa á þetta og hlaupa af stað í þykkum joggingbuxum. Veldu aðsniðinn fatnað sem heldur öllu á sínum stað. Ef það er kalt úti þá er allra best að vera í nokkrum lögum sem hægt er svo að fara úr ef hitinn verður of mikill. Það er ágætis viðmiðunarregla að vera pínu kalt þegar lagt er af stað í hlaupið.

Rétta tónlistin

Tónlist í eyrunum eða ekki, það er persónubundið val. Sjálf kæmist ég ekki langt án þess að vera með einhvern hamagang í eyrunum, mér finnst það hreinlega hjálpa mér að finna taktinn. Veldu lög sem halda uppi gleðinni og hvetja þig áfram. Það er til fullt af flottum hlaupalistum á netinu.

Ertu búin/n að kíkja á Heilsuvísislistana á Spotify?

Mældu þig

Náðu þér í Strava, Endomondo eða annað skemmtilegt forrit sem heldur utan um allar þínar ferðir, reiknar út hraðann á þér, brennslu hitaeininga og staðsetur þig í heiminum. Það er svo gaman að skoða eldri færslur sem minna þig á hvað þú ert alltaf að verða betri og betri hlaupari.

Ég hvet þig til að skrá þig til leiks, sjáumst á ráslínunni!