Jólaneglurnar verða vínrauðar

Selma Margrét Sverrisdóttir naglafræðingur hjá SoS Neglur og Förðun segir að dökkvínrauðar neglur séu vinsælastar um þessar mundir. Minna sé aftur á móti um ásett skraut.

Selma segir að það sé alltaf vinsælt meðal kvenna að fá sér gervineglur. Neglurnar hafa lítillega breyst í lögun og lengst. Sérstök tilefni kalla á fallegar neglur, eins og brúðkaup, stórafmæli eða jafnvel nýárshátíð. 

Selma segir að rauðu neglurnar henti ágætlega um jólin en um áramót vilji konur fá smávegis glimmer líka.

„Reyndar eru dökku vetrarlitirnir mjög vinsælir um þessar mundir en það eru alltaf einhverjar konur sem halda sig við ljósa liti. Það má því segja að hvíti liturinn sé alveg með líka,“ segir hún.

Naglasnyrting hefur lengi tíðkast og litir á naglalökkum breytast með tískustraumum. Undanfarin ár hafa ljósir litir verið langvinsælastir en nú er þetta að breytast og dökkir litir eru allsráðandi.

„Það hafa ekki verið miklar breytingar í þessu fagi undanfarið en þó get ég nefnt að minna er um skrautsteina og þess háttar. Dökkir vetrarlitir hafa verið áberandi undanfarið, vínrauður, navy blár, dökkgrænn og grár. Ljósbleikur kemur svo inn á milli fyrir þær sem vilja það frekar. Það hefur líka verið vinsælt að hafa matta tóna og svo alveg náttúrulegan lit,“ útskýrir Selma.

„Um jólin verður sem sagt dökkvínrauði liturinn að öllum líkindum mjög vinsæll og svo má bæta glimmerinu inn fyrir áramótin,“ segir Selma.

„Næsta vor koma svo inn skemmtilega ljósir litir og þá tökum við táneglurnar líka. Það er minna um það á veturna,“ segir Selma og minnir á að það þurfi þó alltaf að halda nöglunum við svo þær séu fallegar.