Wolff: Við erum ekki alltaf hálfvitar

Lewis Hamilton á Mercedes kom fyrstur í mark, Nico Rosberg á Mercedes varð annar og Valtteri Bottas á Williams varð þriðji. Bottas var jafnframt fyrsti ökumaðurinn sem kemst á verðlaunapall í ár sem ekur ekki fyrir Mercedes eða Ferrari. Hver sagði hvað eftir keppnina?

„Nico var snöggur en mér fannst ég alltaf hafa stjórnina, ég átti smá inni þegar á þurfti að halda. Ég þurfti á þessu að halda eftir Mónakó,“ sagði Hamilton á verðlaunapallinum.

„Ég reyndi allt sem ég gat en Lewis gerði engin mistök. Annað sæti er alveg í lagi. Ég klúðraði bara smá atriði í tímatökunni og þar með keppninni ég þarf að læra af því og passa mig betur næst,“ sagði Rosberg á verðlaunapallinum.

„Liðið stóð sig vel og liðsandinn er búinn að vera frábær alla helgina. Liðið þurfti á þessu að halda við höfum það núna staðfest að við erum eitt af topp liðunum. Ég átti líka góða keppni en snúningurinn hjá Kimi gerði þetta auðveldara fyrir okkur,“ sagði Bottas á verðlaunapallinum.

„Þetta er ekki niðurstaðan sem við vildum ná en ekki of slæmt. En snúningurinn var sama sagan og í fyrra. Ég hélt að við hefðum lagað þetta í fyrra en það virðist allt í einu koma upp aftur núna,“ sagði Kimi Raikkonen sem endaði fjórði í dag.

„Keppnin gekk vel en við þurftum að fylgjast með bremsum og eldsneyti. Það er ýmislegt búið að ganga á innan liðsins en það er gott að snúa við blaðinu eftir erfiða helgi í Mónakó. Við höfðum stjórn á öllu undir lokin, við erum ekki alltaf hálfvitar,“ sagði Toto Wolff keppnisstjóri Mercedes nokkuð kátur í bragði og vísaði til klúðursins sem kostaði Hamilton nánast örugglega unna keppni í Mónakó.

„Við gátum ekki betur. Við urðum bara fljótari eftir sem á leið. Ég þarf að skoða hvað ég hefði geta gert öðruvísi. Áhorfendur virtust hafa gaman af keppninni sem er frábært,“ sagði Sebastian Vettel sem ræsti 18 en endaði fimmti.

„Þetta var mjög skemmtileg keppni. Á svona brautum getum við barist við Ferrari. Uppfærslurnar sem við komum með virkuðu vel. Við erum á útopnu að græja fleiri uppfærslur sem vonandi munu virka vel,“ sagði Felipe Massa sem ók Williams bílnum úr 15. sæti í það sjötta.

„Við vorum í miklum vandræðum með elsneytisnotkun, þegar maður er hægar er eyðslan meiri því maður er lengur á beinu köflunum í botni. Það hafa verið stöðugar framfarir hingað til en dagurinn í dag var erfiður. Vonandi gengur okkur betur næst í Austurríki,“ sagði Jenson Button sem lauk ekki keppni.

„Við þurfum bara að vinna meira en nokkru sinni til að laga stöðuna sem við erum í. Varðandi það að ég vildi ekki spara eldsneyti í keppninni þegar ég var beðinn um það átti það bara við á því augnabliki því ég var að berjast á brautinni,“ sagði Fernando Alonso sem tókst ekki að koma McLaren bíl sínum í endamark.

Hér fyrir neðan má sjá gagnvirkt brautarkort ásamt öllum úrslitum helgarinnar.