ÍA framlengir við fjóra lykilmenn

ÍA hefur framlengt samninga fjögurra lykilmanna liðsins. Þetta kemur fram á heimasíðu félagsins.

Leikmennirnir sem um ræðir eru Jón Vilhelm Ákason, Eggert Kári Karlsson, Ólafur Valur Valdimarsson og Arnar Már Guðjónsson.

Jón Vilhelm skrifaði undir nýjan tveggja ára samning líkt og þeir Eggert og Ólafur, en Arnar Már framlengdi samning sinn út næsta ár.

„Ég er mjög ánægður hvað gengur vel að endursemja við okkar samningslausu leikmenn og það var forgangsmál að ganga frá þeim málum eftir tímabilið. Við bindum miklar vonir við alla þessa leikmenn á næsta tímabili,“ sagði Gunnlaugur Jónsson, þjálfari Skagamanna, í samtali við heimasíðu ÍA.

Skagamenn urðu í 2. sæti 1. deildar í sumar og unnu sér sæti í Pepsi-deildinni á ný eftir árs fjarveru.