Rosberg á ráspól á Suzuka - Vettel fer frá Red Bull

Nico Rosberg á Mercedes náði ráspól í Japan. Liðsfélagi hans, Lewis Hamilton varð annar og Valtteri Bottas á Williams varð þriðji.

Í 21 af síðustu 25 keppnum í Japan hefur ökumaður af fremstu ráslínu unnið keppnina. Þar af 12 frá ráspól. Tímatakan er því mikilvæg á Suzuka.

Í fyrstu lotu tímatökunnar duttu út: Max Chilton og Jules Bianchi á Marussia, Kamui Kobayashi og Marcus Ericsson á Caterham og Pastor Maldonado og Romain Grosjean á Lotus.

Í annarri lotu virtust Red Bull bílarnir eiga erfitt á brautinni, fyrir loka tilraun lotunnar voru þeir í 11. og 12. sæti. Þeir komu út á brautina og tókst að tryggja sér þáttökurétt í þriðju lotu.

Esteban Gutierrez og Adrian Sutil á Sauber duttu út í annari lotu ásamt Nico Hulkenberg og Sergio Perez á Force India og Jean-Eric Vergne og Daniil Kvyat á Toro Rosso.

Þriðja lota var mjög spennandi, Roserg var á ráspól eftir fyrstu tilraun allra ökumanna, þriðjung af sekúndu fljótari en Hamilton. Red Bull virðist ekki hafa bíl sem hentar í Japan.

„Ég er hér til að reyna að vinna, þetta var góður dagur, eitt skref í átt að því að vinna á morgun. Við búumst við því að það rigni á morgun. Ég er mjög bjartsýnn,“ sagði Rosberg.

„Nico var einkar snöggur í dag. Í dag var einfaldlega ekki minn dagur. Stigunum er útdeilt á morgun, ég hlakka til að takast á við veðrið,“ sagði Hamilton.

„Það er gott að nálgast Mercedes, við erum ánægð með þriðja og fjórða sætið. Við gætum átt erfitt í rigningunni, en það er þó þokkalegt bil fyrir aftan okkur svo vonandi getum við barist um verðlaunasæti á morgun,“ sagði Bottas.

Vettel að fara til Ferrari?

Red Bull tilkynnti í morgun að Vettel mun fara til frá liðinu þegar tímabilinu líkur. Sæti hans hjá Red Bull mun taka hinn ungi Daniil Kvyat sem er hjá Toro Rosso núna. Heimildir herma að Ferrari verði skipað Vettel og Raikkonen á næsta ári. Ætli Vettel kitli í fingurna að hefja Ferrari til fyrri frægðar líkt og Michael Schumacher gerði fyrir liðið og Hamilton hefur gert með Mercedes. 

Alonso er líklega á leiðinni til McLaren. Það virðist nánast eingögnu spurning hver víkur fyrir honum. Ron Dennis er vanur að velja reynslumestu ökumenn sem í boði eru. McLaren yrði samkvæmt því væntanlega skipað Button og Alonso. Eric Boullier hefur þó sagt að Button sé ekki nógu hraður, sem er viss vísbending um að McLaren muni hugsanlega innihalda Alonso og Magnussen.

Óljóst er hvað Toro Rosso gerir, nema það að Max Verstappen mun vera þar og Vergne verður ekki þar. Hugsanlega kemur Carlos Sainz Jr. nýr inn í Formúlu 1. Hann er 20 ára, efnilegur ökumaður sem er hluti af uppeldis akademíu Red Bull. Það yrði líklega yngsta ökumannsuppstilling frá upphafi, um 37 ára samanlagður aldur. Því má þó ekki gleyma að þetta er Formúla 1 og allt getur gerst.

Úrslit tímatökunnar fyrir japanska kappaksturinn 2014:

1.Nico Rosberg - Mercedes

2.Lewis Hamilton - Mercedes

3.Valtteri Bottas - Williams

4.Felipe Massa - Williams

5.Fernando Alonso - Ferrari

6.Daniel Ricciardo - Red Bull

7.Kevin Magnussen - McLaren

8.Jenson Button - McLaren

9.Sebastian Vettel - Red Bull

10.Kimi Raikkonen - Ferrari

11.Jean-Eric Vergne - Toro Rosso

12.Sergio Perez - Force India

13.Daniil Kvyat - Toro Rosso

14.Nico Hulkenberg - Force India

15.Adrian Sutil - Sauber

16.Esteban Gutierrez - Sauber

17.Romain Grosjean - Lotus

18.Marcus Ericsson - Caterham

19.Jules Bianchi - Marussia

20.Kamui Kobayashi - Caterham

21.Max Chilton - Marussia

22.Pastor Maldonado - Lotus - tekur út refsingu fyrir að nota 6. vélina

Keppnin á að hefjast klukkan 6:00 í fyrramálið og bein útsending á Stöð 2 Sport hefst klukkan 5:30. Það er þó von á illviðri sem gæti haft einhver áhrif á rástíma keppninnar.