Ökuþórinn Mr. Bean

Grínistinn Rowan Atkinson, sem hvað þektkastur er sem Mr. Bean, er forfallinn bílaáhugamaður og tíður þátttakandi í bílasporti hverskonar. Hann var einn keppanda í kappakstrinum Goodwood Revival í Bretlandi í síðustu viku, þar sem keppt er á eldri bílum.

Það fór ekki betur fyrir „Bauninni“ þar en svo að hann lenti í heilmiklum árekstri og stórskemmdi bílinn sem hann ók. Það var bíll af eldri gerðinni, Ford Falcon Sprint og skemmdist hann það mikið að Atkinson varð að hætta keppni. Hann slapp þó við meiðsli og hefur örugglega séð eitthvað spaugilegt við óheppni sína undir stýri þann daginn.

Rowan Atkinson er með ólæknandi bíladellu og á til dæmis McLaren F1 bíl. Sá bíll hefur líka fengið að finna fyrir aksturslagi Atkinson og hefur hann tvisvar lent í árekstri á honum. Ávallt hefur hann þó sloppið vel úr þessum árekstrum.

Atkinson virðist ekki vera alls varnað þegar kemur að kappakstri, en hann átti um tíma hraðasta hringinn í akstursbraut Top Gear bílaþáttarins. Hann á það líka til að skrifa greinar í bresk bílatímarit og gleður lesendur sína þar líkt og með persónusköpun sinni á ólíkindatólinu Mr. Bean.