Mynd sem á eftir að vekja athygli og umræður

Vísindsskáldskaparmyndin Transcendence verður frumsýnd á Íslandi 30. apríl næstkomandi. Myndin skartar meðal annars Johnny Depp í aðalhlutverki og leikstjórn myndarinnar er í höndum Wally Pfister sem er betur þekktur sem helsti kvikmyndatökumaður Christoper Nolan, sem meðal annars gerði myndina Inception og nýjustu Batman myndirnar. En Christopher er einnig einn af framleiðendum Transcendence.

Transcendence er jómfrúarmynd Wally í leikstjórahlutverkinu og er það ekki í fyrsta skipti sem kvikmyndatökumenn í Hollywood færa sig frá linsunni og setjast í leikstjórastólinn. Má nefna sem dæmi kvikmyndatökumann Steven Spielberg til margra ára, Janusz Kaminski en hann leikstýrði nokkrum myndum sem voru þó langt frá því að vera sérstaklega góðar. Það má velta því fyrir sér hvort kvikmyndatökumenn eigi ekki bara að halda sig við það sem þeir kunna. En reyndar hafa menn eins og Barry Sonnenfeld gert það gott með myndum eins og Man in Black og Get Shorty. Spurningin er hvort Wally takist að heilla áhorfendur

Myndin segir frá dauðvona vísindamanni, Will Caster(Johnny Depp), sem hefur tekist að búa til öflugustu gervigreind veraldar. Will er tölvusnillingur og nýtur virðingar innan vísindasamfélagsins en uppfinning hans vekur ugg í brjósti margra. Hópur manna sem berst gegn hugmyndum Will reynir því að koma Will fyrir kattarnef og tekst þeim að myrða hann. En rétt áður en hann deyr nær hann með hjálp eiginkonu sinnar, Evelyn (Rebecca Hall), að hlaða huga sínum niður í ofurtölvuna og þannig öðlast hann vald yfir örlögum mannkyns. En sá galli er á gjöf Njarðar að hugsun og hugmyndir Will taka algjörum stakkaskiptum og verður Will stórhættulegur.

Söguþráður Transcendence er áhugaverður og vekur upp vonir um að hér sé á ferðinni mynd sem eigi eftir að vekja athygli og umræður. Því söguþráðurinn virðist vera einhversskonar heimsádeila. Þá aðallega á tækninýjungar og tölvuvæðingu mannkyns. En það er þekkt þema í vísindaskáldskaparmyndum að fjalla um þær hættur sem geta stafað af tækninni.

Söguþráðurinn er spennandi og verður gaman að sjá þessa fyrstu mynd Wally. Hann er allavega ótrúlega klár kvikmyndatökumaður og hefur einstaka sýn. Sú sýn virðist ætla að skila sér í þessari mynd því stikla myndarinnar lofar svo sannarlega miklu sjónarspili.

Heimasíðu myndarinnar má finna hér.