Veiði

Laxinn mættur í Blöndu

Karl Lúðvíksson skrifar
Stefán hjá Lax-á og Þórarinn Sigþórsson
Þeir hjá Lax-á fengu skemmtilegan póst í gær frá Höskuldi B Erlingsyni Lögreglumanni og leiðsögumanni í Blöndu og svona hljómar hann: "Ég fór sumsé í gær og aftur í morgun og kíkti í Damminn og Holuna. Fínasta veður og vatn með besta móti í Blöndu. Ég tyllti mér á brúnina fyrir ofan Damminn og sat þar nokkra stund. Þá bylti sér fallegur 2 ára lax í miðjum damminum. Silfurbjartur og fallegur og á að giska 12-14 pund. Annað sá ég ekki en ég neita því ekki að hjartað tók kipp.

Svo í morgun þá ákvað ég að kíkja aftur og gá hvort að ég yrði var við eitthvað líf. Og viti menn 2 laxar lágu neðst á klöppinni fyrir ofan flúðirnar í Damminum. Nýskriðnir upp flúðirnar og hafa rennst sér upp á klöppina. Skömmu síðar þá renndu þeir sér fram af klöppinni og hurfu niður í Damminn. Fallegir 2 ára laxar, mjög svipaðir að stærð þetta ca.12-14 pundin. Ég eyddi dágóðum tíma við Holuna en varð ekkert var þar".

Blanda er nánast uppseld í júní og Júlí, en einhverjir fáir dagar eru eftir.

Birt með góðfúslegu leyfi Lax-á






×