Sigurbjörn Þorkelsson hættir hjá Nomura Holdings

Sigurbjörn Þorkelsson hefur látið af störfum hjá Nomura Holdings en þar starfaði hann sem yfirmaður hlutabréfadeildar fyrir Asíu og Kyrrahafssvæðið. Sigurbjörn fór til Nomura í kjölfar gjaldþrots Lehman Brothers haustið 2008 þegar Nomura yfirtók rekstur Lehman.

Bloomberg fréttaveitan fjallar ítarlega um þessa afsögn Sigurbjörns í dag en hann er annar yfirmaður Nomura í Asíu sem hættir störfum. Nomura er stærsta verðbréfamiðlun Japans.

Sigurbjörn segir í samtali við Reuters að hann hafi þegar ráðið sig í aðra stöðu hjá samkeppnisaðila Nomura en hann vildi ekki að svo stödd upplýsa um hver væri hinn nýji vinnuveitandi hans.

Fram kemur í frétt á Blommberg að þeir lykilstarfsmenn sem fylgdu með í yfirtökunni á Lehman Brothers árið 2008 hefðu fengið borgaða bónusa sína fyrir að halda áfram störfum sínum nú um síðustu mánaðarmót.

Katsunobu Komizo forstjóri Executive Search Partners segir að útlendingum sem hafa komið til starfa fyrir Nomura hafi fundist það erfitt vegna menningarmunarins. „Brottför lykilstarfsmanna mun hafa neikvæð áhrif á alþjóðastarfsemi Nomura og slíkt er líklegt til að halda áfram þar sem smakeppnisaðilar ráða hæfileikaríka bankamenn," segir Komizo.

Sigurbjörn sem gengur undir gælunafninu „Siggi" að sögn Bloomberg vann um 13 ára skeið hjá Lehman Brothers sem yfirmaður á hlutabréfasviði bankans en hann er menntaður við Háskóla Íslands. Fram kemur að Siggi verður áfram staðsettur í Hong Kong í hinu nýja starfi sínu.