NBA upphitun: Miðriðillinn

Deildakeppnin í NBA hefst aðfaranótt miðvikudagsins 29. október. Vísir spáir í spilin fyrir komandi leiktíð og skoðar hér Miðriðilinn þar sem Cleveland og Detroit munu líklega berjast um efsta sætið.

Detroit mætir til leiks með sama lið og á síðustu leiktíð en Cleveland hefur fengið til sín leikstjórnanda við hlið LeBron James.

Gríðarleg uppstokkun hefur farið fram hjá Milwaukee, sem er með nýjan þjálfara í brúnni líkt og Chicago Bulls.

Cleveland Cavaliers

Lið Cleveland fer eins langt og LeBron James getur borið það í vetur, en honum barst nokkur liðsstyrkur í sumar. James var með ótrúlega tölfræði í fyrra þar sem hann skoraði 30 stig, hirti tæp 8 fráköst og gaf rúmar 7 stoðsendingar að meðaltali í leik.

Leikstjórnandinn Mo Williams sem kom frá Milwaukee Bucks er skæður sóknarmaður og vonast er til að hann nái að létta eitthvað á James í sóknarleiknum. Williams skoraði rúm 17 stig að meðaltali fyrir Milwaukee síðasta vetur.

Meiðsli og samningaþref leikmanna setti strik í reikninginn hjá Cleveland í byrjun síðustu leiktíðar, en ekkert slíkt verður uppi á teningnum að þessu sinni. Ljóst er að liðið þarf að bæta árangur sinn frá síðustu leiktíð ef það ætlar sér að halda í metnað LeBron James um að vinna meistaratitil.

Það verður áhugavert að sjá þróun mála hjá Chicago Bulls í vetur, en þar á verða tveir nýliðar væntanlega áberandi.

Liðið datt í lukkupottinn í sumar þegar það hreppti fyrsta valrétt í nýliðavalinu og tók með honum leikstjórnandann Derrick Rose. Hann mun fá tækifæri til að komast hægt og rólega inn í hlutina en er engu að síður ætlað stórt hlutverk hjá liðinu.

Annar nýliði hjá Chicago er þjálfarinn Vinnie Del Negro, sem fenginn var til að taka við liðinu án þess að hafa nokkra reynslu af þjálfun. Það kemur í hans hlut að sjóða hópinn saman og hjálpa mönnum að finna sig á ný eftir miklar hræringar í leikmannamálum undanfarin misseri.

Chicago hefur ekki komist upp úr annari umferð úrslitakeppninnar í 10 ár, eða síðan Michael Jordan lagði skóna á hilluna. Það mun eftir sem áður treysta á menn eins og Kirk Hinrich, Ben Gordon (18 stig) og Luol Deng (17 stig) í sóknarleiknum.

Joe Dumars forseti Detroit lýsti því yfir eftir að liðið féll úr leik gegn Boston í úrslitum Austurdeildar að hann myndi ekki hika við að gera breytingar á leikmannahópnum ef honum bærust góð tilboð.

Engin ásættanleg tilboð bárust þó í lykilmenn félagsins sem hafa verið áskrifendur af úrslitaviðureigninni í Austurdeildinni síðustu ár. Detroit mætir því til leiks með sama kjarna leikmanna og síðustu ár, en nýjan þjálfara.

Það verður áhugavert að sjá hvernig Michael Curry, fyrrum leikmanni liðsins, tekst til - en hann hefur litla reynslu af þjálfun. Detroit verður áfram eitt sterkasta liðið í Austurdeildinni, en þó leikmenn eins og Rodney Stuckey og Jason Maxiell fái líklega fleiri mínútur en áður, er óvíst að þetta lið eigi eftir að bæta sig mikið.

Detroit hefur tapað þrjú ár í röð í úrslitum Austurdeildarinnar eftir að það varð meistari árið 2004 og lék til úrslita árið 2005.

Nokkrar breytingar hafa orðið á liði Indiana frá því á síðustu leiktíð og þar munar mest um að liðið lét miðherjann Jermaine O´Neal fara til Toronto í skiptum fyrir leikstjórnandann TJ Ford og miðherjann Rasho Nesterovic.

Liðið fékk líka bakvörðinn Jarret Jack frá Portland og er þar með búið að stoppa upp í það sem var orðinn veikasti hlekkurinn í liðinu - leikstjórnandastaðan. Jamaal Tinsley hefur mannað stöðuna hjá liðinu síðustu ár, en hann hefur spilað sinn síðasta leik fyrir félagið.

Jim O´Brien þjálfari byggir sóknarleik sinn mikið upp á hraða og langskotum og það verða ær og kýr þessa liðs í vetur. Ekki er hægt að segja að Indiana sé líklegt til afreka í vetur, enda stendur þar yfir uppbygging sem mun taka nokkur ár.

Gríðarleg uppstokkun átti sér stað í herbúðum Milwaukee Bucks í sumar og það ekki af ástæðulausu. Liðið vann aðeins 26 leiki í fyrravetur og var það þriðji slakasti árangur liðsins frá upphafi.

Hvorki fleiri né færri en 10 ný andlit voru því kynnt til sögunnar hjá félaginu í haust. Þar fer fremstur í flokki þjálfarinn Scott Skiles sem áður stýrði liði Chicago Bulls. Skiles verður ætlað að gefa Milwaukee það sem liðið hefur vantað undanfarin ár - hörku.

Síðustu tímabil Milwaukee hafa einkennst af vonbrigðum og meiðslum, en nú á að breyta til. Liðið fékk til sín átta nýja leikmenn í sumar og þar fer fremstur í flokki framerjinn Richard Jefferson (22,6 stig) frá New Jersey Nets. Þá nýtur liðið áfram krafta aðalskorara síns Michael Redd (22,7 stig).

Margir leikmenn hurfu líka á braut og mestu munar þar um leikssjórnandann Mo Williams sem fór til Cleveland. Ógerningur er að spá fyrir um gengi Bucks í vetur, en þó verður að teljast líklegt að liðið nái í það minnsta að toppa slakan árangur sinn frá því í fyrra.