Forprufun á BF2

Senn líður að því að Battlefield 2 komi í verslanir (23.06.2005) og strax eru menn farnir að tryggja sér eintök í forsölu. Geim hefur undanfarna daga verið að spila nánast tilbúna útgáfu af leiknum og því viljum við gefa aðeins forsmekkinn á því sem koma skal. Það vita allir sem spila Battlefield að leikurinn var brautryðjandi á ýmsum sviðum í fjöldaspilunar fyrstu persónu skotleikjageiranum. Battlefield 2 færir sig framar í nýjungum og bætir ýmsa leikþætti til að auðvelda spilun og gera hana æsilegri. Í fyrsta lagi þá er tímasetning leiksins nútímahernaður þar sem markmiðin eru þau sömu og í forveranum þ.e. að halda flöggum og lækka “tickets” hjá andstæðingnum. Því fleiri sem koma saman að óvinaflaggi því fyrr skiptir það um fána. Mælt er með því að nota míkrófón og heyrnartól fyrir samskipti en samskiptakerfið hefur algerlega verið tekið í gegn og er nú mun auðveldara að miðla upplýsingum á bardagavellinum t.d. með því að opna samskiptarás og beina miðaranum á hvaða gerð óvina sem er og tilkynna “spotted” fyrirmæli þannig að hermaðurinn skilgreinir rétta tegund óvina. Einnig hefur stýring á karakter verið einfölduð og ítarlegri uppsetning fyrir stjórnun er til staðar. Umhverfið er vægast sagt flott og gerir bardagavöllinn raunverulegan. Skemmtileg smáatriði hafa verið bætt inn í eins og fuglum sem flýja úr hreiðrum sínum þegar hermenn eða farartæki eru nálægt. Það er ágætis viðbót til að gera sér grein fyrir hvort óvinur er nálægur eður ey. Borðin eru mis stór og snilldarlega hönnuð fyrir allan þann hernað sem er í boði. Farartækin eru margvísleg og þjóna öll sérstökum tilgangi og hafa Dice náð að jafna styrkleika þeirra vel út. Karakterarnir hafa líka sér eiginleika og nýtast þeir vel á bardagavellinum. Markmiðið er að spila sem heild og því nauðsynlegt að hópurinn skipti með sér verkum. Hægt er að skipta niður í litlar deildir og er það mikill plús fyrir klönin sem vilja ná sem mestu út úr skrimmum. Í hverju liði er svo einn “Commander” sem getur kallað in njósnavél til að staðsetja óvinina á afmörkuðu svæði, óskað eftir sjúkra og skotfæra kössum ásamt því að fyrirskipa loftárásir. Það geta allir í liðinu sótt um að vera “Commander” en aðeins sá hæfasti fær stöðuna. Það sem kom skemmtilegast á óvart var hversu bottarnir í einmenningsspilun eru sniðugir og það var hreinlega gaman að taka rimmu á móti þeim þegar engin var að spila á Evrópska netþjóninum sem er kominn upp. Rúsínan í pylsuendanum er karakterþróunin. Á opinberum netþjónum er öllum upplýsingum spilarans safnað saman og honum veittar orður fyrir framúrskarandi störf, reynslustig koma honum áfram á næsta styrleikastig líkt og í hlutverkjaspilum og getur spilarinn séð stöðu sína á alþjóða stigalistanum. Einnig opnast fyrir betri vopn ásamt fleirum góðgætum. Þetta gerir það að verkum að Battlefield heimurinn verður meira lifandi fyrir vikið. Ég vill ekki kryfja BF2 alveg til mergjar enda er þessi grein aðeins til að segja frá því helsta. Dómur mun birtast fljótlega eftir útgáfu leiksins. Sem gamall Battlefield spilari fékk ég trúna aftur og mun taka til hendinni á íslenskum netþjónum þegar leikurinn kemur út 23. Júní næstkomandi. Paunkholm