NBA á Sýn um helgina

Tveir leikir úr úrslitakeppni NBA verða í beinni útsendingu á sjónvarpsstöðinni Sýn um helgina, þar sem allt verður í járnum í lokaleikjum fyrstu umferðarinnar og áhorfendur gætu orðið vitni að síðasta leik Reggie Miller hjá Indiana. Í kvöld, föstudagskvöld, verður sjötti leikur Chicago Bulls og Washington Wizards í úrslitakeppni austurdeildarinnar sýndur klukkan tólf á miðnætti. Þar geta Wizards tryggt sig áfram í aðra umferð með sigri, en Chicago berst um að ná fram oddaleik á heimavelli sínum. Á laugardagskvöld klukkan 23:00 er svo á dagskrá hreinn úrslitaleikur Boston Celtics og Indiana Pacers um það hvort liðið mætir Detroit Pistons í næstu umferð, en bæði lið hafa unnið þrjá leiki og allt getur í raun gerst í þessu einvígi, sem er búið að vera ótrúlega sveiflukennt og dramatískt. Þetta eru leikir sem engir áhugamenn um körfubolta mega láta framhjá sér fara, enda verður allt undir í um helgina og svo gæti farið að leikurinn á laugardagskvöld yrði síðast leikur Reggie Miller hjá Indiana á ferlinum. Miller hefur alltaf verið með næmt nef fyrir dramatík á útivelli í úrslitakeppninni og því gæti sá leikur allt eins orðið mjög sögulegur.