Seattle 3 - Sacramento 1

Ray Allen skaut lið Seattle Supersonics í vænlega stöðu í einvíginu við Sacramento Kings í nótt. Eftir að Sacramento hafði leitt frá upphafsmínútum leiksins, sigu Sonics framúr á lokakaflanum með Allen sjóðandi heitan og unnu sigur 115-102. Ray Allen sallaði 45 stigum á Kings á þeirra eigin heimavelli og dró niður í annars yfirleitt mjög háværum áhorfendum liðsins. Allen virtist ekki geta misst marks á síðustu mínútum leiksins og skoraði körfur í öllum regnbogans litum, þar á meðal 6 þriggja stiga körfur. Mike Bibby átti erfiðan dag og hitti illa, nokkuð sem lið Kings má illa við eins og sést hefur í einvígi liðanna og nú standa þeir frammi fyrir því að þurfa að ferðast norður til Seattle með það fyrir augum að þurfa sigur - ellegar fara í sumarfrí. "Hann skoraði nokkrar körfur úr erfiðum færum, en hann var sjóðandi heitur og stundum verður maður bara að gefa honum lausan tauminn þegar hann er í þessum ham. Hann var ekki á þeim buxunum að tapa þessum leik og hitti úr nokkrum ótrúlegum skotum," sagði Nate McMillan. Seattle hitti úr 53% skota sinna í leiknum, en Sacramento hitti aðeins úr 42% sinna. Peja Stojakovic var góður í fyrri hálfleiknum með 21 stig, en gerði aðeins 6 í þeim síðari. Mestu munaði um slakan leik hjá Mike Bibby í liði Sacramento, en hann fann sig aldrei og þegar svo er gengur liðinu yfirleitt ekki vel. Atkvæðamestir hjá Seattle:Ray Allen 45 stig (6 stoðs), Rashard Lewis 19 stig (8 frák), Jerome James 17 stig (8 frák), Luke Ridnour 8 stig, Vladimir Radmanovic 8 stig, Antonio Daniels 7 stig (6 stoðs, Danny Fortson 6 stig.Atkvæðamestir í liði Sacramento:Peja Stojakovic 27 stig, Cuttino Mobley 16 stig, Kenny Thomas 15 stig (14 frák), Brad Miller 15 stig, Mike Bibby 13 stig (7 frák, 7 stoðs, hitti úr 4 af 17 skotum), Corliss Williamson 12 stig.